叶士域治几乎肯定降班，据报过半英超球会都有兴趣收购主力球员戴纳 (Liam Delap)，当中车路士同曼联最渴望签入呢位英格兰前锋。

车路士经已留意咗戴纳一段时间，而蓝战士领队马利斯卡 (Enzo Maresca) 亦曾经喺曼城担当助理领队，执教过戴纳，相当清楚佢嘅能力。

戴纳亦同样列入曼联今个夏天嘅收购名单，事关红魔鬼相信佢有能力交出比贺兰 (Rasmus Hojlund) 同施亚斯 (Joshua Zirkzee) 更好嘅表现。而曾经负责曼城青训工作嘅曼联现役技术总监韦确斯 (Jason Wilcox)，喺2019年慧眼识英雄，将戴纳由打吡郡带到曼城。

戴纳今季攻入12个联赛入球，佔全队31个总入球超过三分一。基本上多间英超球会都有能力负担戴纳嘅转会费，因为如果叶士域治降班嘅话，佢嘅解约金只係三千万镑。

除咗英超球会外，多支欧洲劲旅都想搵返一位传统中锋坐镇，事关呢类球员喺现代足球买少见少。

戴纳下季都有机会披上拜仁慕尼黑战衣，因为教练甘宾尼一直都相当欣赏佢。而现时排喺意甲联赛榜中游嘅AC米兰都表示有兴趣。

不过最有趣嘅地方就係曼城亦有回购条款，只需要俾四千万镑就可以回购戴纳。不过蓝月亮前锋线有贺兰同新加盟兼表现唔错嘅马莫殊攻坚，无增兵嘅急切性。

戴纳自己亦都係「皇帝女唔忧嫁」，由于好多间球会都俾得起转会费，所以佢会再考虑出价球会俾得起几多人工，自己有无正选踢，对方嘅联赛排名，有无得踢欧联，有无机会冲击锦标等等条件。

不过戴纳又有无能力可以转会到大球会之后都能够交出好表现呢？大家可以参考一下佢嘅入球数字，佢竟然可以喺一支无咩供应嘅球队攻入12球。数据显示，只有三位英超射手嘅预期入球数字 (Expected goals) 比佢嘅9球高。戴纳亦都十分全面，头顶脚踢，能够攻入各式各样嘅入球，而佢盘球能力更加冠绝所有英超前锋，平均每场运球距离高达7.3米，令对方守卫防不胜防。

再者，戴纳如今只有22岁，仲有好大嘅进步空间，前途无可限量。睇嚟各支球队将会展开戴纳争夺战，唔知佢最终情归何处呢？